قصائد ، قصايد، قصيدة : ناصر القحطاني

الغــربـــة

يمه ... الغربة وفرقاك ملتمه

دمعة العين هذي ... مالها داعي

يابعد راسي انتي ليه مهتمه

الوجع لي سواة الناي للراعي

آخر أخباري ... الذمه هي الذمه

والوصايا هذيك تقدي شراعي

مابه الا السواد يحاود اليمه

ولا به الا البياض اللي ورا أضلاعي

وأشعل ما يفارق ليل حضن امه

وأخضر كل صبح من أول أتباعي

يتعب البرق ما أتعب النظر يمه

وانشديهن بعد ما قلت أطماعي

أنجبن لي عروسة حلم أضمه

أو بعد توها تشرب عطش قاعي

واذكري كيف كان العود ابو عمه

ايتعلى صهيله وأرخي أسماعي

امنياتي بدرب ودي أتمه

آخره صعب .. وأصعب منه مرجاعي

يوم كلن فزع له خاله وعمه

يكفي اني وردت العد .. بذراعي

أرفع الراس بين الروس ما همه

وأتباهى وأنا الغرقان بأوجاعي

يمه.. الحر طبعه يعشق القمة

وأنتي اللي فطمتيني على أطباعي

الهواء دام راسي حي ويشمه

والله اني لاسوق هناك ذعذاعي

غربة تلوي ذراع أشجع الخمه

لا تخافينها لو تقلب أوضاعي

يمكن تبعثر الرجال وتلمه

بس بدري عليها تلوي ذراعي

****************************************

بــغــدآد

عساها فاتحة برد وسلام وخاتمة و قَّاد
على دار السلام الله يروّع من بروّعها

حضارة سومر وبابل قبل تشريفة الميلاد
عروق الرسل والعلم واهل الشعر وروايعها

هوى سيف الله المسلول يوم السيوف حداد
مساري سربة ٍ كان المثنى في طلايعها

عروس ٍ زفها المنصور والدنيا لها سجاد
ودلعها الرشيد الله عليها يوم دلعها

بدت بالسندس اللي يهوس الخلان والحساد
وكثر ماهزها التاريخ ما اهتزت مرابعها

بقت خضر ٍ مرابعها بقت تنجب لنا أمجاد
بقت بيض ٍ صنايعها بقت سود ٍ وقايعها

ورى ما تستميت اقلوبنا معها وهي بغداد
ياكبر العار لو ما تستميت قلوبنا معها

عليها الله وامان الله الى ذرات زين ابلاد
هجد صوت القنابل جنب تهليلة جوامعها

دهاها من ورى الحملات ليل ٍ لو نقص يزداد
أهلنا في مدامعها واهلها في مطامعها

هل الحرية اللي لا غشى اصحاب البيوت ارقاد
تفرق بينها من دوية الهاون مضاجعها

هل الحرية اللي بعدها صاروا بنات الضاد
ينوش المعتدي حشمة ملابسهن ويرفعها

هل الحرية اللي قصت أجنحة أكثر الأولاد
مادام ايدينها ماترفع اثنين ٍ من أصابعها

تعودنا على حرق النسل والحرث والأصفاد
تعودنا على نار ٍ يطفيها مولعها

يبس بكفوفها إلا غصن زيتون ٍ وكما المعتاد
عناقيد الهدايا جاتنا من كف صانعها

عسى المقبل مثل صيحة ثمود ومثل صرصر عاد
عشان أهل البيوت الخاربه تبرى مواجعها

ألا وين المراكب سايره في حضرة الرواد ؟
عساهم للدواير لين تدرجهم منافعها

مصير امصار و اجيال وزمن وجموع بيد افراد
لها التاريخ بالمرصاد وان خانت ودايعها

محبتنا عداوه والقلوب قريبّات بعاد
بعد ما نصنع الكذبه نصدقها ونتبعها

خذتنا العنتريات الله يبيح من ابن شداد
وضعنا بالخطب ليت الخطب نقدر نضيعها

تواعدنا مع الوحدة وصرنا نخلف الميعاد
مذاهب وانظمه واحزاب من يقدر يجمِّعها

تصهْيَنْ دم ناس ٍ طايرين بعجة الأوغاد
تصاغرنا مثل ماستصغر الكرسي مراجعها

أخيرا : كم بقى طاغي وكم باغي وكم جلاد؟
وكم لص وكم أصنام وكم أوهام ٍ نصارعها؟

وكم صورة تظن الروح والدم أغنيه وانشاد؟
وهي كل ٍ هناك يدوسها والا يقطّعها

لعل الليله اللي جابت الكابوس ماتنعاد
وبسم الله على بغداد من شي ٍّ يروّعها

********************************

يمه اذنبت

يمه اذنبت ونزحت من العشيره
وان تمنو توبتي مانيب تايب

مابي لدنيا الغنادير اي سيره
طايح من عام الاول في مصايب

يمه اللي حب له طفله صغيره
ويش يسوي لاغدا فيها طلايب

طفلةٍ ماكانت بحبي جديره
بس كانت غير عن كل الحبايب

كنت اسميها العنود المستذيره
ليت اهلها العام سموها عجايب

كنت اجيها مثل الامطار الغزيره
كنت اضيع بجوها مثل الهبايب

وادعي الله هي متى تصبح كبيره
تفهم اشلون المكان يصير ذايب

ان تغنت تصبح الطرقه قصيره
وان تغلت تصبح جروحي عطايب

صنتها مثل البحر لابعد جزيره
ماتركت علومها لاهل الركايب

ديرة ماهي بها ماهيب ديره
لو ثراها عشب واعلاها سحايب

يمه اتحبين طايلة الضفيره؟؟
اااه والله ياعليها اشقر ذوايب

قالت ان جا الراس شايب فيه خيره
قلت يابنت الحلال الراس شايب

قالت الا الحب وشهو وش مصيره
قلت انا استاهل وانا كل السبايب

ماجزا اللي حب له طفله صغيره
غير قبر و ضحكها فوقه نصايب

*****************************

غـادهـ

جيت يا كثر السوالف والقصايد
الدلال مبهره لعيون غاده

جيت اسمرها واحط لها وسايد
من شجون قتلها للبرد عاده

جيت اغني والغلا كله ودايد
عل ذيك النار ما تصبح رماده

جيت ابي من وصلها جروح جدايد
القديمه ملها الليل وسواده

مثل ما ملت عتيقات القلايد
وجيت البسها من اشعاري قلاده

غيرها ما ابي رخا وقت الشدايد
ولا تبي لحدن بعاشقها شهاده

ان رظت ما اظن يرظي الناس كايد
لو تظايق ظاع مفتاح السعاده

كم لقيت اللي لقيت من النقايد
من نصيب طولت كبوة جواده

كم قظى ليلي وانا اطارد شرايط
الدموع لحاف والهاجس وساده

لا عند تحنان ولا الصبر فايد
قلت اسوق الدرب يكفيني جلاده

وجيت اصب الشوق يوم الشوق زايد
عل خاطرها خذا منه مراده

والا انا لي تالي اللقيا عوايد
قهوة من جمرها سكر زياده

***************************

يا بوي

يا بوي أنا من ضوّك أشعلت ضوي
والله ما تفنى ولو كنت فاني

شربت علمك في مراحل نموي
حتى قوى عودي وغنى لساني

تذكر ضناك الحالم .. اللي ينوي
صار أكبر منيّة نوايا وأماني

ياليت عمرك طوّل وعشت جوي
وتشوف كيف أنجبت لك عمر ثاني

عشقٍ على حبل الوريد متلوي
لهواية التحليق وحدي خذاني

ما ضقت كم باكر وأنا أقول توي
هذا زمان الغير ولا زماني

ودي تحدّت هالنجوم بعلوي
دام الثرى يحلم بحزة طماني

من لا دخل بين الرجال متقوي
ما ظمنتي يصهل صهيل الحصاني

واللي على جال الضلوع متطوي
تباشري بمفارقه يا المحاني

والله لا سوّي .. ثم أسوّي وأسوّي
ولا فلا باسمي فلان الفلاني

ماتوا عداي وصار وقتي عدوي
لا بو دقايق ساعته والثواني

أنا على ذاك المكان متروي
بس الوعد لا قلت هذا

**************************

القبر

في مكان تفاخر فيه روس النصايب
و امتلت من عظام الناس فاضي قبوره

كل شي يتراجف فيه حتى الهبايب
والذهايب توارى والنصايب فخوره

وقفت بي قدم رجلي وكلي عجايب
والبكا حولي اسمع له تمرد و ثوره

لين جاء واخجل عيون تودع حبايب
مؤمن جفف الدمع بحديث و سوره

عن يميني بيوت السابقين والذهايب
وعن يساري بيوت اللاحقين محفوره

اسمع اصغر ذنوبي كنه يصيح تايب
والقدم ما نشدت بموقفه عن شعوره

واذكر انه تشره لحظه وكان هايب
قلت خل الطواري ما طلبتك مشوره

دامها جت من الله مرحبا بالمصايب
لو ثقل حمل نفس المسلم اللي صبوره

جيت اشيل الجروح المشرقات العطايب
طيب الله ثرى اللي فارق العين نوره

ما ركزت النصيبه واعتلت راس شايب
كود ابادّل ذاك القبر لا جيت ازوره

عل ما تبخل بماها عليه السحايب
كودها تستر اطراف النصيبه زهوره

كل حزن ملا الدنيا على القلب ذايب
وانقلي يالجروح الحمل لو زاد جوره

كنت اعزي مجاريح بعاد وقرايب
واترك الخاطر لعيني تجبر كسوره

تغرف الحزن وتصب العباير صبايب
وان خلص دمعها لعيون ابوي معذوره

شايل صورته في البال لو كان غايب
ليته اللي يشيل لشخصي اليوم صوره

كان لي ظن في صغري ولا هو بصايب
احسب ان القبور من الحياة مهجوره

عل قبره نعيم وصالحاته سبايب
هي عزاي بوادع مودّع جاه دوره

****************************

النساء

النسا روح المسا

والليل لو فكر يبات

كان ما فيه أغنيات

وكان ماله ذكريات

وكان ما فينا عظيم

ومال أمانينا حليف

وما بنا قلب وليف

ولا لنا قصد شريف

النسا نصف الحياة

الا النسا كل الحياة

آه يا أسرار الخوات

آه يا أحلام البنات

آه يا الطيش الطفولي

آه يالحسن الشفيف آه يالعشق العفيف

آه يالجنس اللطيف

علّمن حتى المرايا والشبابيك اللغات

والرسايل والدواة

صارت أعذب مفردات

كم بكن وانكف مبصر واضحكن وابصر كفيف

ورمشن واهتز سيف

وهمسن وامتد ريف

كم غدن لاخوانهن عزوة صناديدٍ عصاة

بين صفق المرهفات

وبين ضبح العاديات

طاحت أشناب وكراسي وانطلق دمع ونزيف

واعتلا الخف المنيف

والمقابر تستضيف

النسا ضلعٍ عوج لولاه كل العدل مات

مالهن عنا فوات

ومالنا عنهن غناة

تبرق الدنيا على يديهن ويغرينا القنيف

نطمع بتكريم ضيف

وناقف بيوم عصيف

النسا بحر على موجه منايا وأمنيات

والنسا مركب نجاة

نسأل الله الثبات

هن لباس وهن فراش وهن معاش وهن رغيف

إن فتك جوعٍ مخيف

وإن حدا الرجال حيف

النسا حتى شراب الجنه العذب الفرات

تحت ماطى الأمهات

يالهن من مكرمات

كل ما عود بنا الكد أقبل ابن آدم ضعيف

له ورا البيبان طيف

مثل نسناس المصيف

في بلادي يحسبون ان النسا متخلفات

في الضحى مستعمرات

وفي المسا مستوطنات

ما دروا عن هالبيارق شمخ العرض النظيف

فزعة الدين الحنيف

شجرة العز الكثيف

غادة وسجادة وكفين وحجاب وصلاة

من صبايا محصنات

من عروقٍ طيبات

أطهر من ألفين منظر كلها فتنة وزيف

في رجا الصبح الكسيف

واجرة الليل السخيف

كم مكانٍ يعرض أعراض آنسات وسيدات

والهوى له بايعات

والغلاف وله فتات

والحسن تشبير عنق وطولٍ وخصرٍ نحيف

وشي ما ينشاف شيف

لاجل الأول والوصيف

شهب تشابه رسوم الشاشة المتحركات

مال زمتهن طرات

و لا لهن ملح وحلاة

لا ربيع فيه خير ولا به الا بروق صيف

والشتا ما به رفيف

يحيي أوراق الخريف

لي مناحل لي خلايا كلها سكر نبات

لي حصونٍ ناعمات

لي غصون شامخات

لي قوارير ملاها العقل والدم الخفيف

خلفها العمر الكليف

ودونها الحد الرهيف

يا زمن وش جاب حلوى غلفوها بالعباة

جنب حلوى للمشاة وللغبار وللشتات

شف بدل ما هي لواحد صارت لجمعٍ لفيف

كيف أنا اخبرك كيف

شوفها فوق الرصيف

***************************

الذاهبة

الله اللي راد والعقده قضاها اللي عقدها
...................لا على الدنيا سلام ولا لباقي العمر زينه
الفضا ماكنه ألا خيمةٍ طاحت عمدها
......................واللفرح ما كنه ألا شيخٍ أنقصت يدينه
والعمر قطعة زجاج أنكسرت ولا طال أمدها
.................والعرب في العيد بدموع اليتامى مستهينه
والشوارع لفها ثوب الظلام اللي هجدها
................والبيوت أطلال من عقب المحبه والسكينه
والشتا واليل والبرد وسما يصرخ رعدها
...............والعيون اللي ورى الشباك مذعوره حزينه
طولوا في الكهف الاصحاب وبقت روحي وحدها
.....................كنها في كوكبٍ ثاني خلا من ساكنينه
الوداع اللي بعلم العين يعبر من رمدها
..............والوداع اللي بلا علم القفص صدري غبينه
والوداع اللي بلا رجعه علي أمر وادهى
....................والله أنه غرغرت سم وسكاكينٍ سنينه
والعنود اللي جفيت الناس والدنيا بعدها
.....................مدت الفرقا لغاليها وهي تعطي الثمينه
وينها كيف تركتني ليه ما حت في وعدها
......................والقمر لاطل خابرها تجي بيني وبينه
رحت أنادي واتلمس في مهب الريح يدها
................كني حصانٍ بلا صاحب طوى البيدا حنينه
رحت أصيح الصبح وينه والعرب ما رد أحدها
............ما سمعت إلا صدى صوتي يقول الصبح وينه
كنهم من يوم ذيك الشمس غابت عن بلده
................ا طلعوني في النفود وصكوا أبواب المدينه
كنهم من يوم ذيك الذاهبه محدٍ وجدها
...................كل رجال من الشرهه قلع فالدرب عينه
أثرها ماتت وماتت كل فرحه في مهدها
...................والربيع أقفت به اللي كانت التاج لجبينه
جاورت عقب الحدايق حفرتٍ مقسى لحدها
..................حفرةٍ ماني مصدق كيف ضمت ياسمينه
للحزن فيني مثل ما لطهاره في جسدها
...............ويش أسوي لافتشت اللي لها وسط الخزينه
زخرفت حلم وبنت له مسكن وسمت ولدها
.........................أه لو غرد ولدها في خميلة والدينه
عاهدتني وظفرت بيمينٍ أقوى من عهدها
....................والصبي لا خير فيه أن كان مانفذ يمينه
ماتثقى عن رثاها عرقٍ أكتظ بشهدها
.................ولا بقى خلف جدران الجفن عذرى سجينه
كيف عند العالم أيام العرب ما حصى عددها
...................ولا أنا طالت شهوره والله أعلم كم سنينه
لا الثرى فيها نبات ولا المشي خفف نكدها
...................لا السما فيها طيور ولا البحر يمه سفينه
لا القمر هذا مساه ولا العصي هذا رغدها
....................لا الزهر هذا شذاه ولا الذهب هذا رنينه
قالوا الشيخ الفلاني مرجع القوم وسندها
......................قال يبشر بالعوض والعلم جينا ناقلينه
ساق لك بدر البدور اللي نشدها من نشدها
..................جادلٍ هزت عروش وخيبت روسٍ ذهينه
قسمها في جسمها في رسمها الا في رشدها
......واسمها ان جال الغضب قومه على الألسن رطينه
أترك الناي وعطية شيخنا عن لسعدها
.............وانبسط ياعم وأنسى اللي ورى التربه دفينه
قلت ولصدري تناهيت تروع من شهدها
..................آه واويلاه من يجلب على صدري غبينه
خلوا أغلى ذاهبه ترعى ربيع اللي فقدها
.....................والعطا راعيه محدٍ صوبه الله لا يهينه
لو ظمنت الجنه و تفاحة القلب وشهدها
...............قلت من بكره عسى مجنونها تاقف

*************************************

شــمــر

الشمس غابت وكل ٍ دوّر سراجه

والشوق جمّر محرّ الشوق لاجمّر

دام اتجاهك شمال مودعك حاجه

سلّم على حايل وسلّم على شمّر

قدامك الخافق اللي ينشد علاجه

كنه معلّق على برزان ومسمّر

وانت تعرف يا بعد حيي من تواجه

بيضان الافعال لامن الزمن سمّر

ان ضاقوا أعنف من البحر وامواجه

وان راقو اركد من الخرمان لا عمّر

كم صيت بيت ٍ عتق في الباب مزالجه

وكم شيخ اماره قبل تعيينه مومر

وكم حاتمي ٍ تكفيّ فلّة احجاجه

وش لون للضيف لو عن ساعده شمّر ؟

وان مر تاريخهم متلبس ٍ تاجه

كم عاشق ٍ كيّف وكم حاسد ٍ زمّر

في جو ٍ اغلى على الرجلي الى داجه

من ديرة السادس ومن ديرة معمّر

كنّه الا اهدى له البراق فجاجه

خلت غرير ٍ ضحك ومن الخجل حمّر

توارثو حرثه وتمتير ديباجه

ركابة الجيب من ركابة الضمّر

الودّ لا غرس بدري صعب مخراجه

والله ولا الذّ واحلى منه لا ثمّر

ادخل على اللي تطوف البيت حجاجه

من ناقص ٍ عند مدح الغير يتذمّر

والمدح لو كان في الرديان للصاجه

ويقال عمّر بلد بالعون ما عمّر

والذّم لو زاد في الطيب تولاجه

لا احرق ولا اغرق ولا عمّر ولا دمّر

ماني بمتحسب بشعري على حاجه

الا اني اروح ما غنيت

***********************************

درب عمري

خوية درب عمري ماخذاني دونها النسيان
وأنا يا اهل الملامه ما رغبت العيش وحداني

ابي لي مهره ماعسفت صغيره وبنت حصان
ابوها اللي يفك المشكله ويزبن الجاني

واخوها لا تعزوى باسمها فزوا لها العربان
يحق لها الفخر في قولة آل فلان جداني

أبيها في بحر عشرين لا زود ولا نقصان
أبيها اقصر طويلة والوصوف اشكال والواني

أبي الجبهه كما الصبح وكما القوس اسود الحجان
وابيها ناعسات ونرجسيه سود الاعياني

ابي رمش كما ريش يغطي الثلج فالاوجان
وابي جفن يشيل الرمش طربان وكسلاني

ابي خد كما ورد تنّمى في طرف بستان
وابي خشم صغير ومثل حد السيف شاماني

ابي البسمه كما البرق وثناياها كما المرجان
شفاها جمرتين وفمها خاتم سليماني

ابي شعر مثل ذيل الفرس لا طبّت الميدان
او الشلال لامن بات ليله بين الامتاني

ابي جيد سوات ابريق فضه ناتق مليان
وصدر كنه مرايه عليها طلع رماني

ابي ظهر كما الجدول وقدّ مثل غصن البان
وخصر مثل مجدول الاعلان وجسم روياني

ابيها نابية ردف وبطن ظامر جوعان
ابيها مدمج ساق وقدمها لسان ثعباني

ابيها بنت عز من رغدها ينعم الفستان
ابي الرقه وابي الدقه لها باطرافها شاني

ابي المشيه كما اللي طالع من المعركه كسبان
وابيها ترش مع خطواتها مسك وريحاني

ابي صوت الى مني سمعته كن فيه الحان
يدغدغ مسمعي ويثير كل السحر فاشجاني

ابيها حب واخلاص وهواجيس وفرح واحزان
ابيها مثل ما دكتور اهالي العشق وصاني

ابيها لوحة ما صورتها ريشة الفنان
ابيها جوهره ما جابها قاصي ولا داني

ابيها تنتصر لي من زمان حطني نيشان
وتبشر بالغلا اللي مالفى به واحد ثاني

مهرها قلب وشعر يهز القلب والوجدان
وألبسها القصيد وتصبح اوزاني وقيفاني

ابي اللي فات واللي فات صعب ومن لقى العنوان
يرد العلم ولا افضل ابقى اعيش وحداني

********************************

تراها الصوره

تراها الصوره اللي جا عليها فالوداع علوم
فديتك .. ما سواها حرّك الخفّاق واوجاعه

عسى يا احلى هدايا الكون منت بمن حلال القوم
عسى يمّي يجيبك من تركتك عنده اوداعه

معاك اضيع يا عمري وابي لو ساعةٍ من يوم
تضيّعها معي وانسى وش اليوم وكم الساعه

عشيرك من يد الترك ليد الفرس ليدين الروم
هذا هو يعربيٍ لا نسى حلمك ولا باعه

تعال الكل ينشد عنك وطيور الخيال تحوم
وانا مابين طيف وصوره ودفتر وسمّاعه

من اول ما اصبح استفرد بنكهة سرّك المكتوم
واهيم بكل شارع واندهك واخرج عن الطّاعه

أطارد شمسك اللي لآخر الدنيا بدون غيوم
والى منّي ذكرت اعيونك ومغناي وشراعه

أجي يم البحر واحكيله اوّل ما عرفت العوم
وفوق الشّاطي ارسم وجهك اللي سافر اشعاعه

والى جا الموج يمّي ضمّت ايدي وجهك المرسوم
وطاحت نجمتينٍ مرّت الخدّين مرتاعه

واعوّد للحدايق ما بقى من زادي الا اللوم
أدوّر عن عبيرٍ كم وكم نسمه من اتباعه

أداعب وردها والفل والريحان واليشموم
ولا هو ملمس الورد الطبيعي يا اجمل انواعه

وانشّد عنْك اناشيد وعصافير وشجر وكروم
وكرسي باهتٍ لونه وسبع اخيوط لمّاعه

واشوفك في فساتين وذهب ومعلّق بمنظوم
واخبّر بك سرايا كل سوق وغالي بضاعه

واشيل اوراقك ام حروف وقلوبٍ تشيل سهوم
واغنّي ما طرى واطبع عليه الطاري اطباعه

واعوّد للوساده في مساً ماله قمر ونجوم
اصحّي صورتك من نومها وتفز فزّاعه

أنام بحضنها لين الصباح يقول صحّ النوم
وافيق بوجه نجمٍ من صباح الخير مطلاعه

*******************************

حبيبي لا تعذر

حبيبي لا تعذر والجروح اسبابها الأعذار
وانا ادري مايطيب الحب غير بكثرة ذنوبه

يليت الجرح ما بيّح نزيفه باقي الأسرار
ياليته كان ذنب ابدون عذر وتغفره توبه

أنا اللي ماخذا منك القصاص ولا طلب له ثار
على كثر الحقوق اللي تمنّى قول مطلوبه

أهلّي بالمواجع كل مانساقت من الأقدار
واقول يحلّها اللي حطّها للقلب مكتوبه

حطبت ضلوعي وشبّيت ضوّك يا عذاب النار
وانا استر كل هم .. وكل همٍ ضاق به ثوبه

تذكّر كيف سيّلت المشاعر في هواك انهار
عطيتك للفرح صحوه وللأحزان غيبوبه

عطيتك وقتي ورحت اترقّب قاصف الأعمار
وانا سنيني على عمرٍ نثرته فيك محسوبه

حبيبي وان بغيت الصدق ياشين الهوى لاجار
حبيبي وان بغيت الكذب كلّن ملْك محبوبه

دخيلك لا تعذر والليالي خلّها تندار
يبين النور والا ياعساه يطوّل غروبه

*****************************

حبيبي طال موّالٍ

حبيبي طال موّالٍ يجيب الهم والتنكيد
عسى الله ما يخلّيلي خليلٍ كان خلّيتك

يبو عذرٍ يشابه ضحكتة الأطفال يوم العيد
أنا ابكيتك؟؟ حشا واللي فتنّي فيك ما ابكيتك

حرام بعينك الدمعه حرام بصدرك التنهيد
حرام البرد يمضغ راحتينك ما ترضّيتك

تعال وكل جرحٍ فدوتك يبرد من التضميد
أشوفك من زمان وقدّر المولى وحبّيتك

من اول مرةٍ شفتك .. تمنّيتك وصرت السّيد
وتمنّيت انّي اصلا يوم شفتك ما تمنّيتك

تخيّل كيف سكّنتك وخلّيت القريب ابعيد
وروّح كل عاشق يحلم افبيتٍ مثل بيتك

فداه من البيوت اللي يمل ويعشق التجديد
ياعمري شف وهو قلبي متاني فيه وصّيتك

أسج وتنقلب ضوضا الشوارع في عيوني بيد
واجيك ويرتعش في خافقي عصفور لاجيتك

دخيل الطلّه اللي كل ماجت فوق ذاك الجيد
دريت انّك طموحي يا طموحٍ ما تعدّيتك

حشا ما مرّني يومٍ صبوح الا انت بالتحديد
تراك الصبح في عيني من اول ما تهجّيتك

نسيت ان الرّسايل كانت من ايدي تسافر ليد
تعطّر لك مساك وعطرها يحييك ويميتك

نسيت انّك ظفرت بزفرةٍ تستاهل التمجيد
ولا تلحق جزاها لو تجمّعلي تناهيتك

نسيت انّي وضعت الشمس في كفّك وعفت الغيد
وحطّيت القمر في كفّك الثاني وخاويتك

انا لي ذنبك وللذنب عذر وللعذر تمهيد
ولك خيل الرّضا تصهل بصوتي يوم ناديتك

تمتّع بالغلا ياللي يسمّونك عنود الصّيد
والا يا كثر ماغرّتني حروفي وسمّيتك

حبيبي لا سقا الله عرفي اوّل قبل اجيب العيد
سقا الله يوم طشت .. الا سقا الله يوم حبّيتك

*******************************

فضفضت لي

فضفضت لي عن سواليف امها اللي كدرتها
والحزن مثل الحسن لامر لازم ينوقف له

جت تفلسف طفلةٍ مكياجها من فلسفتها
كملت عشرين عام ولاتزال اليوم طفله

يشبع الخلخال والسلسال جايع برقبتها
خيزران لينها بين انتباه وبين غفله

ودي ادري لامشت بشعور الارض اللي تحتها
وانتثنت قلت وين اللي يقول ان الترف له

اه لولا خصرها قلت اسرفو في تغديتها
ما افقره بين النعيم ولايبي من ينتصف له

حاجةٍ تطري عليها جايبتها جايبتها
نسمةٍ ماتعترف بالباب والحارس وقفله

قلت وش ذا اللي خفق بين الضلوع امن اولتها
قبل اقول الضيف جاك اثره فتح كل الغرف له

يوم قدمته لها ليلة سرتبي سلهمتها
قالت اتشرف بقلبك يافتى قلت الشرف له

طرت مع سرب الحمام اللي سرى من حنجرتها
ساعتين وهي تسوق الرمش وابصم واعترف له

تجدل انفاسي واللى حست دفاها كسرتها
وطلقتها للهبوب بكل طيشٍ تنجرف له

لين باخر طيشها قصيت اظافر شيطنتها
لاتشح بكيدها اللي كيدها ابن ادم ضعف له

نسنست عصرية الجمعه وهي تقرا بختها
بين جمع من العذارى كل شي منكشف له

كل ماجن يمشطن شرطانها اللي تعبتها
سمعوها من قصايد خلها اخر ما اتعرف له

ولدت الحلمٍ تدورله وتنشد منظرتها
لدت البرواز اسود دمعها ياماذرف له

لدت توصي مكاتيب قبل مازرفتها
ضمنتها الغاليه دمعه وداع وعطر حفله

قلت ارضيها وجيت وجات والدنيا ملتها
والغزل دار ولقى المشتاق مشتاق يعزف له

كل مازودت وردي السواليف اخلجتها
وكل مازاد الحيا قلت الحلو وش ينكسف له

قالت امي تفتكرني طفله وتظلم بختها
صح انا ماني بطفله صح انا ماني بطفله

*****************************

الصورة

******************************

حبيبي لا تعذر ..!

*****************************

سقا الله

******************************

فضفضت

بحث هذه المدونة الإلكترونية

ناصر القحطاني